Dutnje boahtá atnui elektrovnnalaš poastakássa, go duođaštat identiteahtat jagi 2026 eiseválddiid elektrovnnalaš áššiiddikšunbálvalusaide
Eiseváldepoastta vuostáiváldin nuppástuvvá jagi 2026 álggus álgovurrosaččat digitálan. Go duođaštat identitehtat jagi 2026 álggus dahje dan maŋŋá vuosttamuš Bággobearranlágádus dahje soames eará eiseválddi elektrovnnalaš áššiiddikšunbálvalussii, dutnje dahkkojuvvo elektrovnnalaš poastakássa Suomi.fi-dieđáhusaide.
Dás ovddosguvlui dohko boahtá eiseváldepoasta máŋgga eiseválddis. Suomi.fi-dieđáhusat buhtte báberpoastta mii eiseválddiin boahtá: seammá áššis ii boađe šat maŋŋeleappos reivve ruoktot.
Nuppástusa mihttomearrin lea movttiidahttit olbmuid vuostáiváldit eiseváldepoastta álgovurrosaččat elektrovnnalaččat. Suomi.fi-dieđáhusaid geavaheapmi seastá áiggi sihke riikkavuložiin ja eiseválddiin, go dieđáhusat johtet jođánit ja sihkkarit rivttes vuostáiváldái rivttes sadjái.
Suomi.fi-dieđáhusat lea anus dál 2 miljovnna olbmos. Bálvalusa atnuiváldin evttohuvvo juo dál, go duođašta iežas identitehtas soames eiseválddi elektrovnnalaš áššiiddikšunbálvalusas. Jagi 2026 álggu rájes sierra miehtama atnuiváldimii ii šat jerrojuvvo, muhto Suomi.fi-dieđáhusaid atnuiváldimis muitaluvvo identitehta duođašteami oktavuođas. Dán nuppástusa maŋŋá Suomi.fi-dieđáhusat lea anus badjel njeallje miljovnna olbmos.
Mo ja geaidda Suomi.fi-dieđáhusat bohtet atnui jagis 2026?
- Suomi.fi-dieđáhusat boahtá atnui dutnje, guhte leat dievasahkásaš ja dus ea leat vel anus Suomi.fi-dieđáhusat.
- Oainnát almmuhusa Suomi.fi-dieđáhusaid atnuiváldimis, go duođaštat nannosit identitehtat almmolaš hálddahusa áššiiddikšunbálvalussii nappo geavahat identitehta duođašteamis Suomi.fi-dovdáma.
- Almmut atnuiváldima oktavuođas iežat šleađgapoastačujuhusa ja nanne dan diimmu siste. Ná oaččot iežat šleađgapostii almmuhusa álo, go dutnje lea boahtán ođđa poasta Suomi.fi-dieđáhusaide.
- Šleađgapoastta almmuheami maŋŋá joatkkat identitehta duođašteami dábálaččat ja sirdašuvat áššiiddikšunbálvalussii, gosa ledjet mannamin.
- Fuomáš, ahte jos divššot áššiid organisašuvnna dahje nuppi olbmo beales, Suomi.fi-dieđáhusat boahtá atnui dutnje alddát – ii dan olbmui dahje organisašuvdnii, gean/man beales leat mannamin dikšut áššiid.
Jos it geavat almmolaš hálddahusa elektrovnnalaš áššiiddikšunbálvalusaid nana identitehta duođaštemiin, oaččot dás ovddosguvluige eiseváldepoastta báberpoastan.
Nuppástus ii maiddái guoskkat vuolleahkásaččaid iige daid olbmuid, geain lea ovdogohccin dahje geain lea fámus ovdogohcinfápmudus.
Mállegovva, mo Suomi.fi-dieđáhusat boahtá atnui oassin nana identitehta duođašteami almmolaš hálddahusa elektrovnnalaš bálvalussii jagi 2026 álggu rájes:
Mo beasan lohkat Suomi.fi-dieđáhusaide boahtán dieđáhusaid?
- Sáhtát lohkat Suomi.fi-dieđáhusaide boahtán eiseváldedieđáhusaid Suomi.fi-mobiilaheivehusas dahje čálihemiin sisa Suomi.fi-neahttabálvalussii ja sirdašuvvamin doppe sadjái “Dieđáhusat”.
- Identitehta duođašteapmi dáhpáhuvvá báŋkodovddaldagain, mobiilasihkkarastimiin dahje persovdnakoartta elektrovnnalaš sihkkarastimiin.
- Oaččot almmuhusa iežat šleađgapostii álo, go dutnje boahtá Suomi.fi-dieđáhusaide ođđa dieđáhus.
- Oaččot almmuhusa boahtán dieđáhusain maiddái Suomi.fi-mobiilaheivehusas, jos leat luđen heivehusa ja váldán dan atnui.
Sáhtát maiddái váldit Suomi.fi-dieđáhusaid atnui čujuhusas https://suomi.fi/viestit dahje luđemin iežat atnui Suomi.fi-mobiilaheivehusa.
Naba jos háliidan iežan eiseváldepoastta boahttevuođasge báberpoastan?
Digitála eiseváldepostii sirdašuvvan ii oaivvil dan, ahte giige ii sáhtášii dás ovddosguvlui vuostáiváldit eiseváldepoastta báberreiven.
- Suomi.fi-dieđáhusat ii boađe atnui, jos it geavat eiseválddiid elektrovnnalaš bálvalusaid. Dalle oaččot boahttevuođasge eiseváldepoastta báberhámis.
- Nuppástus ii guoskkat vuolleahkásaččaid iige daid geain lea ovdogohccin.
- Maiddái buot eiseválddiid sádden poasta ii boađe Suomi.fi-dieđáhusaide digitálan, dasgo muhtun eiseválddit sáhttet geavahit maiddái eará digitála kanálaid elektrovnnalaš gulahallamii. Dát leat čilgejuvvon juohke organisašuvnna bálvalusa oktavuođas.
Jos it háliit vuostáiváldit eiseváldepoastta Suomi.fi-dieđáhusaide, sáhtát sirdašuvvat Suomi.fi-dieđáhusain ruovttoluotta vuostáiváldit báberpoastta nuppástuhttimin bálvalusa ásahusaid dahje váldimin oktavuođa Digi- ja álbmotdiehtovuogádaga áššehasbálvalussii. Nuppástusa sáhttá dahkat easkka Suomi.fi-dieđáhusaid atnuiváldima maŋŋá jagi 2026, ii ovddalgihtii.
Válljen báberpoastta vuostáiváldimis bissu fámus bealle jagi hávil. Jos guđa mánotbaji maŋŋá duođašta identitehtas eiseválddiid áššiiddikšunbálvalusaide, Suomi.fi-dieđáhusat boahtá fas ođđasit atnui.
Jos dus lea anus Suomi.fi-mobiilaheivehus, fuomáš, ahte
- dušše beare heivehusa jávkadeapmi ii váldde Suomi.fi-dieđáhusaid eret anus.
- bálvalusa ferte álo váldit eret anus Suomi.fi-dieđáhusaid ásahusain.
Háliidettiinat sáhtát maiddái goas beare váldit Suomi.fi-dieđáhusaid ođđasit atnui luđemin iežat atnui Suomi.fi-heivehusa dahje váldimin bálvalusa atnui čujuhusas suomi.fi/viestit.
Lassedieđut
Lassedieđut Suomi.fi-dieđáhusain: https://suomi.fi/fi/viestit
Lassedieđut Suomi.fi-dovdámis: https://www.suomi.fi/ohjeet-ja-tuki/tunnistus/mika-on-suomifi-tunnistus
Organisašuvnnat mat sáddejit poastta Suomi.fi-dieđáhusaide: https://www.suomi.fi/ohjeet-ja-tuki/viestit/suomifi-viesteja-kayttavat-organisaatiot-ja-palvelut
Ná válddát Suomi.fi-dieđáhusaid eret anus: https://www.suomi.fi/ohjeet-ja-tuki/viestit/viestien-kaytto/viestien-kayton-lopettaminen
Mii lea Suomi.fi-dieđáhusat?
Suomi.fi-dieđáhusat lea diehtodorvvolaš elektrovnnalaš poastakássa, mii buhtte eiseváldepoastta báberpoastta hámis. Bálvalusa geavahit máŋggat eiseválddit ja mearri lassána olles áigge. Boahtán dieđáhusaid sáhttá lohkat Suomi.fi-mobiilaheivehusain dahje identitehta duođaštemiin Suomi.fi-neahttabálvalussii čujuhusas https://suomi.fi. Ná sáhtát lohkat boahtán poastta juohke sajis, gos jođát..
Suomi.fi-dieđáhusaid oažžu atnui luđemin Suomi.fi-mobiilaheivehusa dahje identitehta duođaštemiin čujuhusas https://suomi.fi/viestit. Identitehta duođašteapmi dáhpáhuvvá báŋkodovddaldagain, mobiilasihkkarastimiin dahje persovdnakoartta elektrovnnalaš sihkkarastimiin. Váldimin atnui Suomi.fi-dieđáhusaid oažžu máŋgga sierra eiseválddi poastta elektrovnnalaš hámis.
Almmuhusat ođđa boahtán dieđáhusain bohtet šleađgapoastačujuhussii, man geavaheaddji lea almmuhan bálvalussii. Suomi.fi-mobiilaheivehusa geavaheaddjit ožžot almmuhusa maiddái njuolga heivehusa bokte.
Golggotmánus 2025 Suomi.fi-dieđáhusaid geavahit juo badjel 2,2 miljovnna olbmo.
Lassedieđut Suomi.fi-dieđáhusain: https://www.suomi.fi/ohjeet-ja-tuki/viestit
Mas lea gažaldat go sirdašuvvat elektrovnnalaš eiseváldegulahallamii?
Suopma sirdašuvvá elektrovnnalaš eiseváldegulahallama guvlui muttuid mielde. Jagi 2026 álggu rájes eiseváldepoasta doaimmahuvvo álgovurrosaččat digitálalaččat buohkaide, geat dikšot áššiid elektrovnnalaččat. Eiseválddiid elektrovnnalaš bálvalusaide sisačálihan dievasahkásaš olbmuide bohtet Suomi.fi-dovdáma oktavuođas atnui Suomi.fi-dieđáhusat sierra miehtama haga, jos bálvalus ii leat jo gárvásit anus.
Dat, geat eai sáhte geavahit digibálvalusaid, ožžot dás ovddosguvluige eiseváldepoastta báberhámis, juos eai ieš vállje nuppe láhkai. Elektrovnnalaš dieđáhusaid vuostáiváldima sáhttá maiddái gaskkalduhttit almmuhemiin áššis, goas dieđáhusat sáddejuvvojit fas báberpoastan. Jos olmmoš, gii lea válljen báberpoastta, joatká áššiiddikšuma elektrovnnalaččat, sutnje dahkkojuvvo guđa mánotbaji maŋŋá ođđasit elektrovnnalaš poastakássa Suomi.fi-dieđáhusaide.
Sirdašuvvamis digitála gulahallamii leat máŋggat mearkkašahtti ávkkit. Dat seastá servodaga resurssaid logiid miljovnnaid euroid jagis ja álkidahttá riikkavuložiid árgabeaivvi. Eiseváldepoasttat leat jođánit oažžun láhkai, gávdnojit ovtta sajis ja leat álo geavahusas.
Jagi 2026 álggu rájes eiseváldepoasta doaimmahuvvo álgovurrosaččat Suomi.fi-dieđáhusaide buohkaide, geat dikšot áššiid elektrovnnalaččat. Suomi.fi-dieđáhusaid lassin riikkavuložiidda sáhttá ain boahtit eiseválddiin poasta maiddái earáide digitála kanálaide, jos olmmoš lea váldán daid atnui.
Maŋŋeleappos jagi 2026 áigge lea mihttomearrin, ahte olmmoš sáhtášii válljet eiseváldepoastta vuostáiváldinsadjin Suomi.fi lassin maiddái muhtun eará digipoastabálvalusa, mii deavdá eiseválddiid gulahallamii ásahuvvon diehtodorvo- ja eará gáibádusaid. Válljenfriddjavuohta gáibida láhkaásaheami ja teknihkalaš gárggiideami, mat leat easkka álggus.
Loga lasi: https://dvv.fi/digi-ensin-hanke