Dieđut velgoheaddjái
Bággobearrama álggaheapmi eaktuda álot ohcamuša ja bággobearranvuođustusa. Dábáleamos bággobearranvuođustusat leat duopmostuoluid addin duomut riido- ja rihkusáššiin. Maiddái sosiálalávdegotti mánáidbearráigeahčči nannen ealihanveahkkesoahpamuš lea bággobearranvuođustus.
Bággobearran bearrá maiddái njuolgga bággobearrangelbbolaš oažžumiid, nugo ovdamearkan vearuid, sáhkuid, almmolaš mávssuid. Eará almmosvuoigatvuođalaš dahje daidda buohtastahtti mávssut leat njuolgga bággobearrangelbbolaččat, juos dain lea sierra ásahuvvon lágas dahje ásahusas. Dakkárat leat ovdamearkan máŋggat oadjomávssut. Bággobearrangelbbolaš oažžuma bággobearrama ohcamis ii sáhte njuolgga geavahit áššeolbmo.
Eará ollašuhttindoaibmabijut
Velggiid bearrama lassin bággobearramis sáhttá bidjat ollašuhttimii maiddái muhtin eará geatnegasvuođaid.
Dakkárat leat earret eará
- Ádjin
- Duogušteapmi
- Oassemáksodávvira ruovttoluotta váldin ja konttuid čilgen
- Dávvira luohpadangeatnegasvuohta
- Máná fuolaheami ja deaivvadanvuoigatvuođa guoski mearrádusaid ollašuhttin
Bággobearranvirgeoapmahačča doaibmaváldi álgá, go bággobearranohcamuš boahtá johtui. Bággobearran ovdána dán maŋŋá bággobearranolbmá vihkkedallan doaibmabijuid vuođul.
Gáržžes bággobearran
Velgoheaddji sáhttá háliidettiin ráddjet bággobearrandoaimmaid bivdimiin gáržžes bággobearrama. Doaibmabijut rádjašuvvet bálkká, ealáhaga dahje eará dakkára olggosmihtideapmái, mas olggosmihtideami čuozáhaga ii dárbbaš rievdadit ruhtan. Velggolačča boađut ja opmodat čielggaduvvojit registariin. Gáržžes bággobearrama oktavuođas velgoheaddji ii sáhte ohcat iežas ruhtaoažžuma passiivaregistrerema vejolaš maŋit doaibmabijuid várás. Gáržžes bággobearrama gieđahallanmáksu lea velgoheaddjái hálbbit go dábálaš bággobearramis.
Passiivaregisttar
Juos velggolaččas eai gávdno boađut dahje opmodat, mat olggos mihtiduvvojit, velggolaš gávnnahuvvo bággobearramis váreheapmin ja bággobearranášši jođusdoallan nohká. Velgoheaddji sáhttá jođusdoallanáigge bivdit, ahte su ruhtaoažžun merkejuvvo jođusdoallama nogadettiin passiivaregistarii. Ášši ii registrerema áigge leat jođus bággobearramis eaige dalle dahkko aktiivvalaš bearrandoaimmat. Juos velggolaččas goittotge registrerenáigge gávdnojuvvo opmodat, man sáhttá olggos mihtidit (ovdamearkan vearromáhcaheapmi), dat olggos mihtiduvvo maiddái dakkár ruhtaoažžuma buorrin, mii lea passiivaregistaris. Passiivaregistreren lea fámus guokte jagi dan beaivemearis, go easttaduođaštus lea addon.
Dieđut velgoheaddjái -siiddut suomagillii gávdnojit dáppe.