Tiäđuh viälgulâžân

Ko velgi šadda pággupeerrâm peerrâmnáál, te viälgulâžân vuolgâttuvvoo táválávt almottâs ääši kieđâvuššâmvuálásâžžân puátimist. Almottâsâst láá viälgán kyeskee tiäđui lasseen ääši tipšoo olgospeerrâmalmaa ohtâvuotâtiäđuh.

Almottâs kieđâvuššâmvuálásâžžân puátimist ana sistees meid avžuuttâs ohtâvuođâ väldimist já táárbu mield munealmottâs puáttee págguperâmist.

Kieđâvuššâmvuálásâžžânpuáttimalmottâs lasseen viälgulâžân vuolgâttuvvoo máksuavžuuttâs. Jis viälgulâš máksá veelgis majemustáá máksuavžuuttâs mäksimpeeivi, te tast iä toovâ merkkim pággupeerrâmregisterân. Págguperâmist iä talle meid riemâ toimáid viälgulii omâduv uuccâm várás.

Pággupeerrâm lii veelgij riävtálâš peerrâm. Pággupeerrâm jotonvyelgim váátá, ete viälgoo ocá mävsihánnáá viälgán keerrivrievtist tuámu já ocá ton maŋa pággupeerrâm. Velgi puáhtá leđe meid njuolgist pággupeerrâmtohálâš, tego ovdâmerkkân viäruh, sááhuh teikâ táhádâsmáávsuh, kuás viälgoo puáhtá sirdeđ taid ucâmušâst págguperâmân.

Mii tábáhtuvá, jis velgi ij maksuu

Jis viälgulâš ij määvsi jieijâs veelgi, te sun kannat väldiđ ohtâvuođâ ääši tipšoo pággupeerrâmalmajân. Pággupeerrâmalmaa pargon lii uuccâđ viälgulâžân kullee omâduv vâi viälgoo finnee máávsu. Págguperâmist láá jieijâs pargoi porgâm várás vijđes tiätufinnimvuoigâdvuođah. Omâduv puáhtá uuccâđ ovdâmerkkân tiäđustâlmáin sierâ registerijn. Toos lasseen viälgulâžân puáhtá toohâđ pággupeerrâmčielgiittâs, mast sun kalga adeliđ tuođâlijd tiäđuid jieijâs ekonomâlii tiileest. Jis viälguliist kávnojeh pággupeerrâmtoháliih puáđuh tâi omâduv, te pággupeerih tom.

Viälgulâš puáhtá tarkkuđ pággupeerrâmašijdis šleđgâlii ášástâllâmpalvâlmist (suomâkielân, ruotâkielân já eŋgâlâskielân). Palvâlmist viälgulâš puáhtá eereeb iärrás mäksiđ jieijâs veelgijd, printtiđ pággupeerrâm tiätu äššikiirjijd, uuccâđ rijjâmánuppoojijd já eres hiälputtâsâid päälhi págguperâmân já peividiđ tiäđuidis.

Viälguliist kenigâsvuotâ adeliđ tiäđuid

Viälgulâžân puáhtá toohâđ meid pággupeerrâmčielgiittâs. Viälgulâš kalga adeliđ pággupeerrâmčielgiittâsâst luávdee tiäđuid omâduvâst, maid sun oomâst tääl sehe lii ovdil omâstâm. Viälgulii puáhtá kenigittiđ adeliđ tiäđuid sááhu uhkijn. Puástutiäđui adelem tâi tiäđui syeligâsâst toollâm pággupeerrâmčielgiittâsâst lii rikkoos. Viälgulii puáhtá povdiđ pággupeerrâmčielgiittâsân. Jis sun ij nuávdit povdim, te pággupeerrâmalmai puáhtá kenigittiđ suu puáttiđ sááhu uhkijn tâi táttuđ poolis viežžâđ viälgulii.

Meid taggaar olmooš, kiäst lii viälgulii omâduv haaldust tâi kote lii toohâm omâdâhân kyeskee sopâmuš viälgulijn, lii kenigâs adeliđ tárbulijd tiäđuid viälgulii puáđuin, omâduvâst já ohtâvuotâtiäđuin. Pággupeerrâmalmai puáhtá kenigittiđ adeliđ tiäđuid sááhu uhkijn. Págguperâmist lii vuoigâdvuotâ finniđ västideijee tiäđuid meid virgeomâháin já almos tooimâ tipšoo siärváduvâin.

Pággupeerrâmalmast lii vuoigâdvuotâ väldiđ haaldun pággupeerrâmnáál omâduv selvâttem várás velttidmettum selvâttemmateriaal, tego ovdâmerkkân sopâmušâid, kävppikiirjijd já lasseen reekkigtuálukenigâslii reekkigtuálumateriaal.

Pággupeerrâmtohálii omâduv usâdijn pággupeerrâmalmast lii táárbu mield vuoigâdvuotâ adeliđ lekkâđ uuvsâid já luuhâid sehe moonnâđ aassâmvistijd, ráájuid já eres västideijee soojijd. Pággupeerrâmalmai puáhtá táttuđ poolisist virgeiše olášuttem várás.

Tiäđuh viälgulâžân -siijđoh láá suomâkielân tääbbin.